Cumo ben sendo hábito tols anhos, faç-se la matacia de l cochino, na Praça, an Sendin para la qual todos ls partecipantes dan 10 euros, pena ye que alguns solo ban a estas cousas de la tradiçon, se fur de gracia ou pagas por la Câmara ou la Junta. Mas por haber crise nun quier dezir que nun se fágan estas cousas, l que ténen ye de ser feitas a las custas de cada un i nó cul denheiro de ls outros. L bideo bai a chegar a muitos sendineses que ándan pul mundo i que gustaran de ber ls amigos i la Praça , ou melhor l SAGRADO.
Hoije l die stá mui friu i la nubrina gelou todo, mais parece ua nebada de las balientes. Mas la Praça , cula calor de la fogueira i de la giente, yá stá sien gilada i miesmo ne ls telhados alredredor de l Sagrado, nun se bei carambelo.
Mas nun penseis que esta fui la sola matancia de l die, cumo las giladas ampéçan a ser grandes i la giente quier tener yá chouriças i tabafeias para ls familhiares que bénen passar l Natal, tratórun de matar l cochino i hoije quaije habie ua matancia an cada rue.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
