La cooperatiba mandou-mos las buonas fiestas i dou-mos mais ua buona nuoba de l sou trabalho, que yá nun ye solo de serbir melhor ls sous associados, pormoçon de l bino i de la lhéngua, mas tamien de eisemplo i de apoio als que mais precísan, neste tiempo de crise. Quando muitos inda nun se dórun cunta de las deficuldades de la nuossa sociadade i cuntínan a sacar l que púoden, la cooperatiba bai mantenendo ls sous trabalhadores i ajudando ls outros.
Talbeç séiamos algo repetitibos nesta critica i inda mais sien sermos mais cuncretos, mas ampeçamos por alertar las cuncéncias, mas se fur esse l causo teneremos que denunciar la prática i ls nomes de quien solo pensa neilhes miesmos. L Natal piede paç i amor, mas Jesus bieno al mundo para que la berdade i la justícia chegássen a todos.
Cumprar ls pordutos de la cooperatiba ye ajudar l Praino, ajudar las sues pessonas, ajudar anstituiçones an peligro, ajudar ninos sien familhia, ajudar la lhéngua mirandesa que bai sendo pormobida por bários patrocínios, an jornales, rádios, telbisones i por todo sitio adonde chega l bino de Tierras de Miranda.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
