Na cuntinaçon de l que screbi onte, ye amportante splicar outra çfrencia que ten dado muito que falar.
Las palabras que an mirandés acában an “ on ” i que an sendinés acában an “ ão ”.
Sendinés: -lião -coração -rezão
Mirandés: -lhion -coraçon -rezon
Ne l mirandés, al cuntrairo de l que acunteciu ne l pertués, l “ n ” antrebocálico latino nun zapareciu. I an sendinés, se por un lado stamos acerca de l pertués por outro nó.
La cumbençon tenie que adotar ua soluçon i cumo l sendinés ne l plural diç; liones, coraçones, rezones; la forma mirandesa fui la soluçon.
Un librico para ls mais pequeinhos
Para ls mais pequeinhos serie amportante arranjar este librico, mas ls sendineses bán a ancuntrar alguas çfrencias i esso ye tamien amportante. Para tirar las dúbidas, podereis falar cun l porsor de mirandés ou comiyo. Tamien podeis fazer las preguntas para l SAL, ne l curso de mirandés. Amadeu Ferreira stará siempre desponíble.
Ls nuobos
Las nuobas tequenologies son amportantes i ls mais nuobos cumo podeis ber, gústan de las outelizar.
L ansino de l mirandés yá ye possible por la anternete. Ne l SAL yá hai un curso. Deixai de jogar un jogo i nesse tiempo daprendei la nuossa léngua.
Sendin bisto de l Camino de Ruolos
Sendin ye lindo bisto de todos ls lhados i muito mais para ls sendineses. La nuossa léngua tamien ye linda. Las bistas puóden mostrar-se i todos las bedes, mas la léngua teneis que la ir a scubir bós.
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
