Sendin – 2
Alfandega – 1
Mais un jogo de l campeonato çtrital de futebol i l Sendin, jogando an casa, ne l campo Balentin Guerra, ganhou l jogo al Alfandega.
L jogo ampeçou cun las dues eiquipas cun algun miedo. L Sendin porque tenie perdido l último jogo i l Alfandega porque nun querie perder, para quedar a la frente de l Sendin ne l campeonato.
L Sendin a tentar atacar
Ls purmeiros trinta minutos fui un jogo mórnio, mas l Sendin als poucos fui ganhando fuorça i nun ademirou nada que l Sendin fazísse l purmeiro golo.
Ls jogadores a festejar l golo
Fui acerca de l fin de la purmeira parte que l Sendin marcou i zde anton, l Alfandega nada mais fazie que eibitar que l Sendin marcasse mais golos.
Na segunda parte l Sendin tomou cuonta de l jogo i l segundo golo acabou por aparecer.
L Sendin a dominar l jogo
A ganhar por 2-0, l Sendin ampeçou a jogar menos, mas nada fazie adabinar que l Alfandega podíssse fazer un golo, mas a trés minutos de l fin, marca mesmo i faç 2-1.
L Sendin cumo que fui picado por la puonta de ua guelhada i até l fin buolbiu a mandar ne l jogo, mas l resultado mantubo-se.
Ne l fin, l Sendin era quien atacaba
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
