La adenda a la Cumbençon diz que l sendinés puode screbir cun “l” an percípio de palabra, mas hoije screbi lhaboura, cun “lh” a la moda mirandesa i esto para bos dezir que stá bien de las dues maneiras. Tamien ne l acordo ourtográfico de la léngua pertuesa hai palabras que se puoden screbir de modo çfrente. Para ls que son contra la adenda, ende teneis un eisemplo de que nun fui ua cousa mui zacertada.
Yá bistes la boubielha?
Hoije fui a ber se las binhas íban bien arrebentadas i se tenien sembrado muito pan i pul camino bi essa boubielha atrás dun sartigalho. La mie máquina nun ye mui buona, mas alhá l tirei l retrato. L anho nun me pareciu que iba mal, yá que las binhas ban bien arrebentadas i hai muito pan sembrado. Mas l que me ademirou, ye que l ganado por tierras de Miranda ye tamien ua realidade.
Ua manada de bacas i un bitelico
Quando le staba a tirar l retrato a estas bacas, bi al loinje ua mai cun la sue cria i tratei de ir a tirar-le l retrato. Se la bida de la laboura ye custosa, tamien ten l sou ancanto i podemos ber sfregantes que son berdadeiros quadros de pintores afamados. Nun ye de ademirar yá que la naturaleza ten todo l que hai de mais lindo. Nós muitas bezes ye que nien mos damos cuonta.
La mai i l bitelico
Mas nun hai solo bacas, mas tamien canhonas, cumo zde l tiempo an que l home daprendiu a criar l ganado. Yá bai habendo cordeiricos nuobos i ende ls podeis ber atrás de las canhonas mais bielhas. Boziei-le para deixáren tirar l retrato i quedórun-se a mirar para la máquina.
Nun stá bien?
Mas cumo l pastor las chamou, ampeçorun a andar i you bi que un cordirico habie nacido un rato antes. Mandei-los ir mais debagar i dezie alhá se nun quedou un retrato bien pimpon!...
Mas fui perciso dezir-le que tenie un de ua baca cun l filho i eilhes que iban a quedar melhor.
Qual quedou melhor?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
