Ua de las atraçones turísticas de la nuossa region ye la pesca. Tenemos cundiçones cumo poucas regiones ténen, nun solo por la cualidade de l peixe, mas tamien por las cundiçones de ls rius. L riu Douro ye l riu cun maiores possiblidades, mas ls pequeinhos rius cumo l Angueira onde se puode apanhar tamien l lagostin i l Sabor cun las sues afamadas trutas son çtinos turísticos para quien gusta de la pesca.
Este ye un lúcio
De ls peixes maiores que se cunsiguen pescar, ls lúcios i las carpas son ls que ténen batido ls recordes. Este Lúcio fui pescado ne ls Pisones por l nuosso comandante de l posto de la GNR, l cabo Felipe, que amablemente me dou ls retratos.
Son estas cousas que fázen las nuobas i puoden dar nome i bida a la nuossa tierra.
Cumo podeis ber ten 1,10m
L lúcio ye un peixe carníboro i ten uns dientes mi aguçados i grandes, por esso hai que tener cuidado al tirar-lo de la auga. Ye mui saboroso i you puodo dezir esso porque yá comi i ye mesmo buono. Por l que tengo aperciado bénen yá muitos pescadores de todo l Norte de Pertual d’aperpósito a la pesca, als Pisones i a Forcaleiro.
Mirai bien para ls dientes
Tamien se péscan carpas mui grandes, mas cumo este lúcio, inda nun tenie bisto nenhun peixe tan grande, pescado eiqui. Cumo se puode cumprobar, pesaba mais de 9kg. Tenemos que dar a coincer estas nuobas. Se esto acuntecisse nua outra tierra até la telbison tenie dado la nuoba, mas l HOIJE bai fazendo l que puode.
L peixe na balança
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
