Yá muitas bezes oubi chamar chibiteiros a ciertos muntones de piedras i mesmo a cousas aparecidas. Se alguas bezes esso ye berdadeiro, outras ye meio berdade i outras ye ua falta de coincimento de las cousas. Stube nel castro de Cigaduonha, nas arribas, onde hai mais de trinta anhos acumpanhei arqueólogos de la Ounibersidade de l Porto.
Un chibiteiro?
Este castro fui studado cun apoio de l Interregue III, mas hoije nun passa de un sitio abandonado i çtruido. Quando l studórun i porque nun se dórun al trabalho de fazer las cousas bien feitas, nien l museu de Miranda fui oubido i se fui nun dixo l que debie, nun se dórun cuonta de la riquesa que alhi staba an termos culturales.
Este si que parece las dues cousas
Quando ne ls percípios de ls anhos 80 l besitei cun arqueólogos i l Pe. Mourinho, habie alhá cistas (sepulturas) i tamien alguas que fúron aporbeitadas para fazer chibiteiros. Mas hoije l que hai? Bamos a tener un QREN i cousas parecidas para fazer l mesmo?
Será la mesma cousa?
Tirei l retrato a un home que me acumpanhou an drento dun. Será que nun merecie un studo bien feito?
L castro de Cigaduenha ye ua de las cousas mais amportantes an termos turísticos i un de ls sítios de onde se puoden ber melhor ls abutres i las maiores caídas d’auga de las arribas.
Las caídas d’auga
Para quien nun sabe – chibiteiros éran casotas de piedra para guardar ls chibicos acabados de nacer, anquanto ls pastores andában ne l monte i nun ls podíen lebar.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
