Yá mais de un anho que se stan a fazer obras na barraige de Picuote, para aumentar la potencia i son obras de melhones de euros. Mesmo acerquita de nós, se porpara l feturo i se trabalha para Pertual ser mais rico. Son centenas ls trabalhadores que alhi trabálhan.
La barraige de Picuote
Para quien nun sabie ou se preacupa cun pequeinhas cousas, inda que amportantes, fago hoije esta nuoba porque ye mais amportante que se pensa i que mais ua beç pon Sendin ne ls lugares mais altos. Las obras son defíceles i hai que fazer grandes scabaçones debaixo de tierra, para las centrales onde ban a quedar las nuobas turbinas i ls tunels para lebar la auga até alhá.
Las antradas i ls tubos d’aire
Las scabaçones debaixo de tierra
Fuora tamien hai grandes obras cumo la ansecadeira que bai a zbiar l’auga anquanto se ténen que fazer las antradas de ls tunels. Para fazer essas obras hai que tener reglas de sigurancia i ye eiqui que Sendin, ou melhor ls sendineses mostramos que stamos bibos i damos l nuosso cuntributo.
Onde se bai a fazer la ansecadeira
Ls nuossos bumbeiros cun la angenheira de la sigurancia
Fui para porparar, cumo yá mais bezes se fizo, que ls nuossos bumbeiros, neste caso, l comandante i l segundo comandante fúrun cun la responsáble por la sigurancia a ber i a fazer ls porparatibos para que todo steia an cundiçones. Bárias situaçones stan a toda la hora a ser studadas para l que puoda acuntecer.
Na frente de las scabaçones
Debaixo de montanhas de piedra, an berdadeiros formieiros, muita giente trabalha i ye alhi que hai que saber l que fazer se algo de mal acuntecer, mas l HOIJE acumpanhou todo i puode ber que tenemos ls nuossos bumbeiros porparados i a trabalhar cun la sigurancia de la obra. Ye estes sendineses que ténen que ser loubados i apoiados.
La angenheira ye nuoba, mas nun ten miedo
Eisaminórun-se bários locales i ls de maior peligro, para se ir dando cunta de l andamento de ls trabalhos i de l que hai que porparar para ua eimergencia. Al fazer la ansecadeira haberá que tener alhi ua ambarcaçon de socorro, mas esso ye cun ls comandos.
Para ir a la obra ténen que se respeitar las reglas
I you até botas speciales tube que calçar
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
