Fazer de cuonta que hai un acidente grabe, ye un modo de treinar ls serbicios de porteçon cebil, para saber se stan porparados para situçones que puodan aparecer i a las quales hai que responder de la melhor maneira, para eibitar que ls males séian maiores. Fui l que fazírun nas obras de l túnel de la barraige de Picuote.
L acidente
Nestes casos, solo ls comandos sáben de l que se passa i todo ye feito, cumo se se tratasse de un acidente de berdade. Houbo la anterbençon de todos ls meios possibles i fui cumprobado todo l sistema de socorro, para casos grabes. Parecie mesmo un acidente de berdade, mas gracias a Dius que nun passou de un faç de cuonta .
Ls bumbeiros an açon
L acidente fui ne l túnel que stan a abrir na barraige i houbo l faç de cuonta , de que habie muortos i feridos grabes i cun situaçones bin cumplicadas. Ne l fin fizo-se ua abaluaçon de todo i inda se ancuntrórun falhas an alguas cousas, que yá fúrun melhoradas, para que nun acidente, que puoda assuceder, todo cuorra melhor.
L trasporte de ls feridos
La percipal falha, fui nas comunicaçones i na formaçon de l pessoal que ten que dar l alerta. Yá fúrun dadas anstruçones para melhorar essas falhas i melhorar tamien l sistema de eiluminaçon, nun caso de acidente grabe, que percisa de meios própios.
La situaçon drento de l túnel
Ua cousa amportante fui ber l trabalho de ls nuossos bumbeiros, que cumprírun bin la sue misson. La sue anterbençon, fui cunsiderada rápida i apropiada.
Ye assi que porqui se trabalha i se porcura star al nible de las tierras mais adelantradas. Stamos a pensar ne l seclo XXI i nó agarrados a stórias que yá solo se cúntan a belar, ou an ounibersidades de stória.
Até las nuossas moças stan prontas
Muitos de ls nuossos moços i moças que alhi stubírun ténen studos ounibersitarios, mas ándan de botas.
Parecie mesmo berdade, habie muortos
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
