Santo Antonho yá passou i ben ende l San Juan. Ua de las tradiçones deste die ye fazer la fogueira i saltar por riba deilha. Cumo l questume se bai acabando, pensei este anho fazer la fogueira, mas para esso fui a ber se habie yerbas de San Juan para la fogueira.
La yerba de San Juan
Yá nun hai muitas pul campo, mas inda ancuntrei alguas i bin pimponas. Cumo l anho bino de feiçon, yerba ye l que hai mais, mas de la outra toda. Dezie-me assi un tiu:
-Este ye l anho de ls burros, uns ténen de comer, a la farta i outros ténen que trabalhar que nin burros, para arrincar tanta yerba nas huortas.
Trebo de quatro fuolhas
Hai yerba de toda la cualidade, até ancuntrei trebo de quatro fuolhas. Dízen que dá suorte, mas tenie que l ancuntrar na manhana de San Juan. Inda l disse al tiu que iba a colhé-lo nesse die, mas dixo-me que assi nun daba. Mas que bou a spormentar, bou…
Yerba i froles de todas las culidades
Ye ua pena la Primabera star a acabar, mas cumo diç l pobo:
- Todas las staçones de l anho ténen l sou ancanto, son cumo la giente.
You acrecento:
- La bida ye un momento,
Quien nun l bibe cun amor,
Bibe siempre nun tormento.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
