La sociadade bai eiboluindo i ls moços i moças, cada beç mais, ban querendo cousas çfrentes i ye cada beç mais defícele motibá-los. L trabalho de ls porsores tamien ye mais defícele, para ancuntráren soluçones nuobas, porque las anstituçones cuntínan cumo se inda stubíssemos ne l séclo passado.
Porparaçon de la proba de slide
Mas ls porsores de Sendin ténen porcurado formas de traer ls alunos anteressados na scuola i l porsor Guedes i la porsora Marta ampeçorun por fazer un slide de sala, apuis de pabilhón i até yá tenen ua parede de scalada. Para quien nun sabe, l slide ye atrabessar de un lado para outro, por dous cabos de aço i agarrados a dues roldanas, cumo se bei ne l retrato.
L porsor Guedes i l ampregado Dino ne l sitio de lançamento
Cumo stamos ne l fin de las aulas, fázen probas de todo l que daprendírun i la proba de slide fui ua cousa bonita de se ber. Todo esto solo fui possible porque ls porsores se anteressórun i porque tubírun l apoio de ls ampregados, Dino, Fernando Pires, Fitas i Lurdes.
Un aluno a porparar-se para fazer la proba
La parede de scalada tamien ye ua cousa amportante i tener que subir por la parede inda ye mais, mas esso queda para outro die. L slide fui para alunos i porsores, mas destes poucos se astrebírun a fazer-lo. La porsora Marta si que ye baliente, mas l porsor Guedes ye l maior animador destes çportos.
Un aluno a fazer la proba
Cumo podeis ber, la proba nun ye para quien ten miedo de las alturas, mas cun treino todo se faç.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
