Ls alunos de mirandés de l Ciclo, fazírun ua tarde de risota, apersentando un telejornal, an mirandés, mas cun un testo houmoristico. Fui ua cousa bien feita i que you bou a mostrar un pouco, cun retratos, de que darei la splicaçon. Nun será bien acumparado, mas inda nun tengo modos de fazer bídios, mas nun faltará tiempo.
Ls que fúrun a ber
L telejornal tenie l nome de - tele-guincha an direto- i cunsante íban dando las nuobas, mostrában las reportages an direto, cun las pessonas a falar i a cuntar l que habie passado. La doutora Bamba, bruxa mui antendida an todo, fui chamada para resolber l zaparcimento de l ampregado de l Ciclo, Dino. Cumprometiu-se a ancuntrá-lo, apuis de fazer las sues rezas.
La doutora Bamba
La doutora Bamba ancuntrou mesmo a Dino i bino apersentá-lo, an direto i splicar cumo cunseguiu scubrir quien l habie lebado. Dino, que fala bien l mirandés, nun fura el de Bila Chana i casado cun ua sendinesa, cuntou todo l que passou.
Dino a splicar l que passou i la drª. Bamba
Cumo Cristiano Ronaldo ten un pequeinho porblema, nun pie, fui yá apersentada ua sendinesa que diç star porparada para jogar ne l sou lugar. I podeis tener la certeza que joga mesmo bien. Aparciu eiquipada i todo i tamien fala bien l mirandés.
La jogadora
Durante l tele-guincha houbo tamien ua cunfuson, cumo acuntece cun ls porgramas, an direto, stában a dar la nuoba de Britney Spears haber ido a fazer un cuncerto an Atanor i quando la stában a apersentar, aparciu outra a dezir que era eilha la berdadeira. Yá naide sabie qual era la cantante berdadeira.
Qual ye la berdadeira?
La respuosta saliu de un garoto que staba acerca de mi.
-You lougo dixe que nun podie ser, benir a Atanor la Britney Spears, son mas ye dues brasileiras dessas que ándan por ende.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
