Fui ua fiesta de fin de anho, que merecie ua reportage de la telbison i para serbir de eisemplo a muitas scuolas, de l que ls porsores i alunos puoden fazer. La ourganizaçon i todo l que fui apersentado, fui un trabalho de toda ua scuola, cun prencípio meio i fin. Fui un trabalho coletibo que baliu la pena ber.
Ls pais a ber la fiesta
Ampeçou por apersentar todos ls cunceilhos de l çtrito, que éran repersentados, cada un, por un aluno, cun la andicaçon de l cunceilho i que falaba subre l que de melhor tenie cada un. I ne l fin, aparecie ua nina a repersentar la bila de Sendin i a dezir que tamien tenie todo, cumo ls outros.
Ls cunceilhos
La repersentante de Sendin
La repersentante de Sendin, iba dezindo todo l que habie i de todo ls alunos fazien ua mostra, cun ua cantiga ou dança. Primeiro fui l pan i la dança de la cantiga, sega sega ceifeiro . Gustarie de poder poner eiqui todo, mas bou a fazer un decumentairo cumpleto para poner ne ls retratos.
La dança de la segada
Las ubas benírun a seguir, ls freijones bormeilhos i brancos para comer cun tripas, ou pie de cochino i de baca, ls garbanços para l bacalhau, ls alunos cun sacos onde traien patatas,cebolhas i muitas mais cousas, todo fui tan bien repersentado por ls alunos que, cumo bos dixe yá, merecie ua reportage na telbison.
Las alunas a repersentar las ubas
Por fin, fúrun las danças i nun faltou l repasseado. Acabou cun ls alunos todos a cantar ua cantiga a Sendin. Apuis de l spetáculo, alunos pais i porsores fúrun para la scuola, onde comírun ua merenda, an que cada un lebou l que podie. Ye esta la berdadeira cumbibencia.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
