La fogueira de San Juan ye un ritual que ben yá de muito antes de l crestianismo. La eigreija aporbeitou muitos de ls usos i questumes de ls pobos i antegrou-los na relegion. La eigreija éran ls crestianos, nun admira que ls pobos fazíssen de las tradiçones de siempre ua passage para la nuoba relegion. Yá hai amboras de l seclo VI de que se fazien.
La Yerba de San Juan
Ls San Juanes a secar
La tradiçon de se fazer la fogueira eisiste an toda la Spanha i inda hoije se fázen muitas danças alredor de la fogueira de San Juan, nas Asturias, Leon, Galiza i Catalunha. La mais coincida ye la dança prima de San Juan , an Mieres, nas Asturias. Alhi yá se faç la fogueira de outra maneira, mas todo mundo dança alredor de la fogueira, cumo an Sendin. Tamien ye uso an muitos sítios saltar la fogueira.
Ls Marrolhos
Mas hoije l que bos quiero mostrar son las yerbas que mais se úsan, an Sendin, para deitar na fogueira. Ls San Juanes, Ls San Pedros i ls marrolhos. Ne l die 18 mostrei-bos, por anganho, ua yerba cumo sendo un San Juan, mas era ua canha-frecha, que ten la frol amarielha. Hoije podeis ber la çfrencia.
La canha-frecha
Las yerbas son apanhadas uns dies antes i quédan a secar para ardéren bien, na fogueira. Ls marrolhos son las que dan un oulor mais fuorte. Agora para arder mais tiempo la fogueira, yá l bótan capones que ye para fazer brasas, para ir botando las yerbas, als poucos i todos saltáren.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
