Todos ls anhos la Associaçon de ls Bumbeiros de Sendin faç la fiesta de las Santos Populares, antre l die de San Juan i l die de San Pedro. La fiesta ye un cumbíbio de todos ls sócios de la Associaçon, que págan la sue parte na despesa de la fiesta.
L terreiro de l quartel anfeitado
A assar las sardinas
La fiesta ye ne l terreiro de l quartel, anfeitado cun las bandeiras tradicionales. Come-se antremeada de cochino i sardinas assadas, cun pan caseiro i bino que líeban de casa. L caldo berde i l melon, fázen tamien parte de l comer. Todos ls anhos se ajunta muita giente.
Ls sócios i familha
La mesa de ls comandantes
Este anho, cumo se fizo an Sendin la reunion de ls comandantes de ls bumbeiros de l çtrito, la fiesta fui mais animada i tubo musica i foguetes. Esta fiesta ye amportante, yá que ajunta ls sócios i ls bumbeiros antes de l tiempo de ls fuogos i todos ténen que star porparados i animados para ls cumbater.
Ls foguetes ne l aire
Ye amportante ber las familhas a partecipar nesta fiesta, l que faç cun que lougo de pequeinhos, ls moços i moças se anteréssen por ls bumbeiros. Nun ye por acaso que Sendin ten muitos bumbeiros moços i ua fanfarra cun tantos eilementos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
