Hoije l calor era tanto que fui apanhar fresco para ls lados de l riu. Anquanto andaba por alhi lembrou-se-me de l debate subre las potencialidades de l turismo i nun hai dúbida nenhua, que hai muita cousa que se debe fazer, para que las cousas demúden.
Ua casa rural
Nós tenemos muito que puode anteressar a muita giente, mas para las pessonas beníren acá, hai que tener onde eilhas puodan quedar a drumir i a comer, se nó nun bénen ou se bénen ban para las outras tierras a deixar l ganho que puode dar l turismo. Sendin yá ten cundiçones, mas éran percisas mais i las casas rurales recuperadas puodien ser ua deilhas.
L barco, antre San Paulo i l Picon de l diabro
Hai que criar struturas para que todo funcione bien. Staba a ber passar l barco i quedei a pensar que pouca giente conhece l riu Douro arriba de l Pocinho i esta ye ua de las partes mais lindas de l riu. Ye dun lado i doutro que se ancontra ua de las maiores i mais puras zonas de turismo ambiantal de la Ouropa.
Este retrato fui tirado hai mais de 25 anhos
Sabeis onde fui tirado l retrato?
De l lado squierdo, ye la fraga de la fuonte del pingo.
Las arribas ténen tanta cousa, que cada beç ye mais neçairo ampeçar a tratar deilhas. La fuonte de l pingo ye un eisemplo, yá quaije nun se puode ir alhá. Mas nun chega cumponer las cousas, hai que las tratar apuis. Por esso son percisas struturas para que todo ande bien, se nó acuntece cumo al que se fizo ne l porgrama de l Interregue , onde se gastórun milhones para todo star cheno de silbas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
