Onte fizo-se un debate subre las potencialidades de l turismo para l zambolbimiento rural, ourganizado por la AZATS i L Centro de Musica Tradicional Sons de la Tierra, ne l salon de la Junta de freguesie, antegrado nun ciclo de debates que ampeçórun ne l die 13 de Junio i que cuntinan ne l die 11 de Julio.
La mesa de l debate
L ourador deste debate fui l Drº Carlos Ferreira i tubo la partecipaçon de bárias antidades. L persidente de la Assamblé de Freguesie i l persidente de la Junta de Freguesie de Sendin, ls bereadores de Sendin, por l PS i por l PSD, Câmara de Miranda, la Diretora de l Centro de Saúde de Miranda de l Douro i pessonas ligadas al turismo.
Ls partecipantes
Neste debate fui mui agradáble ber la persença de un númaro buono de mulhieres i las anterbençones fúrun de anteresse. Parece que ls debates ban sendo mais partecipados i ne l de l die 11, serie amportante que stubíssen bastantes pessonas, yá que se bai a falar de l mirandés.
L ourador
Parece que este debate trouxo cousas anteressantes, cumo seia la amportancia de ajuntar todas las pessonas para ls trabalhos que hai que fazer.
La luta contra la burocracie i ls anteresses de grupo fui la cunclusion mais signeficatiba, assi cumo la necidade de apostar na marca Miranda.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
