La nuossa léngua ten que, cada beç mais, ser outilizada para screbir subre la stória, las artes, la cultura, la tequenologie, la ciéncia, subre todo… Solo assi puode ser porcurada por ls que nun fálan nin scríben l mirandés, se solo neilha ou tamien neilha, se podíren ancuntrar ls temas que le anteréssan.
Pasteur (foto Saber-sapo)
Muita giente saberá muito subre Pasteur, mas hai tamien quien pouco ou nada sabe i cumo naciu ne l die 27 de Dezembre, lembrou-se-me de falar subre el. Mas que ye que esso puode anteressar? Anteressa porque l saber nun acupa lugar i ye amportante que las pessonas sában quien fúrun ls grandes homes i mulhieres. Ye ne l Anstituto Pasteur que se fázen las percipales bacinas.
L calendário de ls 120 anhos de l’Anstituto Pasteur
Pasteur fui un ciantista de la medicina i de la química, fui l percipal oubreiro de la çcubierta de las bacinas i fui por esso que criou l Anstituto que ten l sou nome, onde se faç l maior trabalho de ambestigaçon, para fazéren las bacinas. Que passarie hoije sien la bacina de la gripe? Fui el tamien que çcubriu l modo de cunserbar ls alimentos, cumo l leite, que hoije ye cunserbado por pasteurizaçon (l nome ben de l nome del). Se mirardes para l pacote de l leite, ten alhá UHT(pasteurizado a altas temperaturas).
Gustabo Eiffel (foto Saber-sapo)
Outro home amportante, fui l angenheiro de la torre Eiffel, de que todos ls sendineses yá oubírun falar. Tamien naciu ne l die 27 de Dezembre i por esso falo nel, mas tamien porque fui l angenheiro de la puonte D. Maria ne l Porto i de la puonte Eiffel de Viana do Castelo.
La torre Eiffel
La puote D. Maria
Tamien naciu ne l die 27 de Dezembre ua mulher que ye merecedora de se falar neilha, Marlene Dietrich , fui ua de las melhores artistas i atrizes de cinema de todos ls tiempos. Ne ls anhos 30, cumo eilha era alemana, Hitler querie que l apoiasse, mas eilha fugiu para les Stados Ounidos i fizo spetáclos para las tropas aliadas, durante la 2ª. Grande Guerra.
A dar un spetáclo para ls soldados aliados
Marlene Dietrich fizo muitos filmes i grabou montes de singles i álbuns que inda hoije son mui oubidos por todo l mundo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
