La giente durante la bida bai studando l tiempo, se ye que hai tiempo, porque la bida ye ua ruodra que roda sin parar, mas la giente ten un sentido, que ye bibir i faç de todo para durar l mais possible. Studar l que se passa alredor de cada un ye ua eibidéncia i trasmitir als outros l que se bai çcubrindo ye algo que se faç sien se dar cunta – ye la sabedorie popular - .
L ribeiro de la carabilha
Muita de la sabedorie popular era trasmitida an berso, talbeç porque antraba melhor ne l oubido de la giente. Uns cháman-le ditos dezideiros, outros cháman-le sabedorie de ls bielhos i outros cháman-le ambersados de l tiempo. Cumo stamos an finales de Janeiro lembrei-me de bos screbir dous ou trés.
Un pan (tierra de tri(g)o)
L purmeiro ye un que ten a ber culs dies i l Sol, cumo sabeis ls dies ban sendo maiores i desso se dában cunta i anton dezíen: A finales de Janeiro yá l Sol entra an cada rieiro. Hai muito modo de dezir la mesma cousa, mas l sentido ye l mais amportante. Ls dies son maiores i l Sol stá mais alto , cumo dezíen tamien.
L tri(g)o yá bai crecido
Habie muito cuidado cun ls panes i subre eilhes hai muito dito, cumo l que screbi hai un anho, todo porque l pan era l que mais falta fazie, porque la fame era muita i habie que star atento a la bida de l pan, zde que era sembrado. Mas hoije bou a screbir un dito que poucos saberán – quien penheira i amassa, nun l fúran la fogaça - .
La mano
Este dito ten a ber cul bício de ls garotos fazéren un buraco na fogaça cul dedo. Cula fame i nun tenendo faca, furában la fogaça cul dedo para tirar l miolho. Dende tamien al dezir l nome de ls dedos chamar al andicador – fura bolhos -. Quien amassaba nun passaba gana de pan i por esso era uso fazer tamien l bolho para ls garotos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
