La chuba parece que ben a sustituir la niebe i cumo yá nun acuntecie hai muitos anhos, tenemos un Ambierno a la moda anti(g)a. Niebe, friu i chuba, dies i dies sien çcanso. D’atrás ls agricultores tratában de ls sous artimanhos, nas curraladas i ls garotos íban fazendo anzonas i outras cousas que le fazien falta.
Las curraladas
Tamien l HOIJE aporbeitou l die, an que nun se podie salir de casa para screbir mais ua beç subre l tiempo de hai muitos anhos, para mais ua beç lembrar ls mais bielhos i trasmitir als mais nuobos cumo era la bida de ls garotos de hai 50 anhos i mais, ne ls dies que nun tenien que ir culs animales pul campo.
Las canhas de foguete
Ne l Sagrado habie un folharanço, ua árbole mui grande, mesmo an frente de la eigreija i que daba uas flores de que se fazie tinta. Nas piedras de l adro de la eigreija habie mesmo uas poçaquitas, onde se zmagában essas flores i se fazie tinta, mas lebabamos manadas deilhas para fazer tinta an casa. Solo la habie ne ls tinteiros de la scuola i quien querie screbir an casa, tenie que la cumprar, mas onde staba l denheiro para la maiorie de ls garotos. Screbísse cun canetas de aparos i alguas éran un palo cun un aparo na puonta.
L papagaio de papel
Mas essa tinta guardába-se tamien para tenhir ls papeles i cartones cun que se fazien ls papagaios de papel i las bandeiras de San Juan. Para fazer ls papagaios éran percisos tamien las canhas i l cordel de ls foguetes, por esso ls garotos andában atrás de las canhas. Chegábamos a fazer rolos de mais de 100m de codel.
Benjamin Franklin
Para fazer ls papagaios tamien era perciso cola i tamien la faziemos de las secreçones resinosas de las cereijeiras i de las almendreiras. Quantos bos lembrais destas cousas?
L papagaio de cordel fizo-me lembrar de un grande home que fui Benjamin Franklin, que puso ua chabe nun papagaio para atrair ls relampos i fui el l’ambentor de l para-raios, mas l mais amportante que el fizo, fui la declaraçon de la andependéncia de l’América, paiç que hoije ten cumo persidente, un democrata, filho de un home negro i de ua mulher branca, l persidente Obama, de quien todo mundo spera ua nuoba orde mundial.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
