L die de San Sebastian ye ne l die 20 de Janeiro, mas la giente passou a fazer la fiesta ne l Demingo lougo a seguir al die 20, se este nun fur Demingo i fui l que acunteciu este anho, an que la fiesta fui die 25. Zde que hai bumbeiros an Sendin, estes passórun a fazer la fiesta porque son siempre bumbeiros ls mardomos.
Ls que fazírun l peditório
Para fazer l peditório ban ls bumbeiros mardomos i la direçon de ls bumbeiros, acumpanhados por ls gueiteiros de Sendin. I Sendin yá ten bários grupos de gueiteiros. L peditório ye feito cumo manda la tradiçon i alhá líeben las stacas para spindurar ls pies i chouriça i ls cestos para las bárias ouferendas que la giente dá.
Ls mardomos cun la staca
La giente dá pies, oureilhas, chouriças, barbadas, sufinos i chouriços del sou cochino, cunsante l que ouferecírun para que San Sebastian ls ajudasse a criar ls cochinos até estes íren al talho, que ye cumo quien diç: - a la matancia. Todo apuis de la missa ye arrematado ne l adro de la eigreija para ajudas a la fiesta.
Ls mardomos cun l cesto
Esta fiesta ye mais relegiosa i tradicional, sendo la fiesta de San Sebastian, ne l Berano, ua fiesta cun atibidades mais mundanas. Mas ye siempre ua alegrie ber ls gueiteiros i ls mardomos cun las stacas i ls cestos, a fazer l peditório. Tamien naide quier perder la arremataçon de las cousas ne l fin de la missa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
