Mogadouro – Sendin
L jogo fui an Mogadouro i inda bien yá que l campo ye un campo onde se puode jogar, mesmo an dies cumo l de Demingo. Staba un die de friu i niebe. Inda nebou durante algun tiempo i todo quedou branco, mas lougo bino un merujeiro que derretiu la niebe i parece que fui un milagre, durante l jogo fizo sol.
L Mogadouro antrou fuorte para marcar lougo cedo
L Mogadouro ten ua eiquipa mais spriente i ampeçou l jogo para marcar lougo cedo, talbeç cun miedo de que l tiempo se stragasse i fusse mais deficel marcar. Mas fui perciso un sendinés, a jogar ne l Mogadouro, para marcáren l purmeiro golo i fui l mesmo jogador que acabou por ganhar un penalte que dou l segundo golo i que fizo l terceiro.
L Mogadouro jogaba melhor
Ye pena que l melhor jogador de l Mogadouro seia de Sendin i que nun jogue por la sue tierra, mas tamien eiqui ls anteresses se antrepónen. Por esso quando se diç que debien poner a jogar solo ls de Sendin, ye ua eiluson. Mogadouro inda ten outro sendinés na eiquipa, mas las pessonas son libres i querer un mundo a la moda de cada un, nun puode ser.
L Sendin antrou bien na segunda parte
Na segunda parte la eiquipa de Sendin fui melhor i cumo dezien ls de Mogadouro, Sendin staba a perder, mas fui un sendinés que fizo ls golos, deberie star a ganhar. Todo parecie que iba a demudar i l Sendin tubo dues ouportunidades de marcar, cun l jogador de l Sendin solo cul guarda redes de l Mogadouro.
L Mogadouro torna a marcar
L Sendin tentaba marcar
Quien nun marca perde i l Mogadouro faç outro golo, mas l Sendin cuntinou a jogar para marcar un golo i tubo ouportunidades de l fazer, mas fui l Mogadouro a fazer l 5-0, resultado final.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
