Quando toca nua sesta ser die 13, la giente diç que ye die de azar. Hoije las pessonas yá nun fázen muito causo desso i agora muito menos, porque bibimos cun tantos porblemas que l azar se calha nien se bei. Mas hai siempre situaçones que cústan a antender i todos nós, mesmo sien acraditar, deziemos – que azar.
La santa Cena (feita por ua sendinesa)
L númaro 13 ye cunsiderado de mala suorte. Na numerologie l númaro 12 ye cunsiderado un númaro de cousas cumpletas cumo 12 meses ne l anho, 12 tribos de Eisrael, 12 apóstolos de Jasus ó ls 12 signos de l zodíaco. Yá l 13 ye cunsiderado un númaro eirregular. La sesta-feira fui l die an que Jasus fui curceficado i tamien ye cunsiderado un die de azar. Somando l die de la sumana de azar (sesta) cul númaro de azar (13) tenemos l más azarado de l dies.
Scaleiras
Hai inda la coincidência de que na Santa Cena se sentórun a la mesa treze pessonas, sendo que dues deilhas, Jasus i Judas Eiscariotes, morrírun an seguida, por muortes trágicas, Jasus por eisecuçon na cruç i Judas probablemiente por anfuorcamento.
L gato negro
Hai muitas outras cousas que la giente diç que son sinales de mala suorte, cumo passar por baixo duas scaleiras ou ber un gato negro. Mas cumo an todo, cada un ye que sabe. Pul si pul nó atentemos nel dito de Castilha, eiqui tan acerquita: - No creo an brujas, pêro que las hai, hai!...
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
