Quando parecie que iba a chober i l puolo deixaba de caer por todo lado, aparecírun ls fuogos que inda bénen a poner l aire mais cuntaminado. L die stá meio anfarruscado i algo si irá a chober, mas l fuogo ye que nun sperou i acerca de la staçon de Mogadouro, caras a Santiago lebou todo delantre.
L fumo i las nubres tapában l cielo
L HOIJE iba a passar por alhi i registrou l que se passaba. La aldé de Santiago staba toda cubierta de fumo, mal se bien las casas, ls bumbeiros de Mogadouro ye que éran ls respunsables por l’ataque al fuogo, mas la cousa ampeçou a quedar mala i houbo que chamar ls de Sendin para ajudar.
Santiago mal se bi
L fuogo caminaba caras a las casas
Inda stabamos ne l sitio de l fuogo quando ls bumbeiros de Sendin chegórun, rápidos cumo siempre i lougo tomórun posiçon para cortar la frente de l fuogo de modos a nun chegar a la aldé. Abaliada la situaçon, debrebe ancuntrórun modos de parar l fuogo.
L autotanque antre l fuogo i la aldé
Salimos de l sitio de l fuogo porque habie outro sitio adonde ir, l fuogo staba cuntrolado i l susto de la giente habie passado, que outro pior nun benga. Queda mais un alerta de que este anho todo l cuidado ye pouco.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
