Todos ls anhos, ne l Sabado de Páscoa, hai jogo de bola antre solteiros i casados, ye mais un modo de ls sendineses cumbibíren. L jogo fui ne l campo de l Grupo Çportibo, mas ls eiquipamentos éran ls que cada un puodo arranjar, porque tamien faç parte de l jogo, las reglas séren outras, porque hai que mostrar que l amportante ye la cumbibéncia.
Ls eiquipamentos éran de bárias quelores
La eiquipa de arbitrage era credenciada
Hai sendineses que nun pérden la ouportunidade de benir passar las bacanças i jogar este jogo. L jogo ye siempre ua fiesta, cun ls árbitos a faborecer la eiquipa mais fraca al cuntrairo de l que acuntece cun ls árbitos de la Liga que faborécen siempre ls mais poderosos.
Adonde staba la bola?
Mas tamien se jogou bien
Este jogo ten muita amportáncia, para se ber la eiboluçon de las barri(g)as de un anho para l outro i assi tomáren atençon al colestrol. Tamien ye ua nobidade ber ls casados que durante l anho mudórun de campo i que ténen que aguantar las çancadielhas de ls solteiros.
Ls anhos yá se nótan
La cousa parecie mesmo mala
Todas las ouportunidades sírber para arranjar çcussones, para rir claro i muitas bezes hai que arranjar modos de parar l jogo para curar falsas lesiones ou por queréren arranjar un penalte. Mas todo corriu bien i fui ua tarde animada antre todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
