Hoije fui die de bacina de ls perros acontra la rábia, an Atanor. Todos ls anhos pul més de Maio l beternairo munecipal bacina ls perros tenendo cada tierra l sou die para la giente lebar ls perros a la bacina. Zde uns anhos para cá que ls perros ténen un chip cul númaro i son bacinados indo l beternairo a las aldés.
Ls porparatibos para la bacinaçon
La bacinaçon de ls perros acontra l arábia fui ua cousa buona que se puso cumo oubrigatória, porque fui ua de las maneiras de acabar cun ls perros danhados. You inda me lembra de l miedo que la giente tenie de quando se amentaba que habie un perro danhado pul termo.
L sitio adonde se registrában ls perros a bacinar
Dou esta ambora para ber que inda se ban fazendo cousas de que la maiorie de la giente nien se dá de cunta, mas que son amportantes. La ambora ye tamien amportante para que ls que la léien i ténen perros ou gatos, que ténen que bacinar esses animales, se ls ténen an casa.
A eidentificar un perro, pul chip
Na Sendin l die de la bacinaçon ye l die 28 deste més, mas se nun podierdes lebar ls animales nesse die, podeis ir a outra aldé alredor de Sendin. Hai eiditales nas juntas de freguesie.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
