amadeu · 14/03/2007

Eilaborado i ourganizado por Amadeu Ferreira

2003-2007

1ª eidiçon

Este bocabulairo ampeçou a salir ne l Jornal Nordeste, na páigina Tierra Giente i Lhéngua, an Janeiro de 2003 i cuntinou a salir puls anhos de 2004, 2005 i 2006 (até Márcio), solo cun assento ne ls testos an mirandés ende publicados por giente de las bárias tierras de Miranda. Al todo salírun ende 5479. Cuntina-se agora este bocabulairo para ajudas als alunos de l curso de mirandés on-line de www.sendim.net , acrecentado culas palabras nuobas que báian salindo ne l curso ou an que l segneficado seia preguntado puls alunos. Ampeça-se, assi, cun un bocabulairo cun 5926 antradas de palabras i spressones.

Dado l modo cumo fui custruído este bocabulairo, el nun solo ye mui ancumpleto cumo ten solo las palabras que fúrun aparecendo ne ls testos de Jornal Nordeste, i agora tamien neste curso, l que puode nun ser repersentatibo de l bocabulairo mirandés nien que las palabras que acá stan séian las mais ousadas an mirandés. Assi i todo, ten la culidade de ser ua cousa biba, cun assento nas palabras que fúrun sendo ousadas por mais dun ciento de pessonas ne ls testos que fúrun publicando.

Tratando-se dun bocabulairo i nó dun dicionairo, cada palabra nun aparece cun todos ls sous segneficados, mas solo cun aqueilhes cun que aparece ne ls testos de adonde las palabras fúrun sacadas. Algues palabras son caratelísticas solo de uas tierras de Miranda, outras de outras, mas l mais deilhas son quemuns a todas las tierras que fálan mirandés.

Assi i todo, cul tiempo, hemos de ir cumpletando este bocabulairo. Cumo ye purparado an atençon als alunos de l curso de mirandés, deilhes speramos la crítica i las sugestones para corregir algun erro i, assi, melhorálo i torná-lo mais cumpleto. Para esso, de tiempos a tiempos, siempre que se justefique, eiremos fazendo nuobas eidiçones.

14 de Janeiro de 2007.

Amadeu Ferreira

2ª eidiçon

Cumo pormetido sal agora este bocabulairo un cacho acrecentado, saltando l númaro de antradas 7052, quier dezir, mais de mil do que na relaçon a la 1ª eidiçon.

Metiu-se acá l bocabulairo de ls testos publicados pul to l anho 2006 ne l jornal Nordeste, mas tamien muito de l bocabualiro que fui salindo nestas liciones de l curso on-line. Mas inda falta tratar muito de l bocabulairo dessas liciones.

Bamos a mantener la publicaçon dua nuoba eidiçon deste bocabulairo a cada dous meses. Assi haba tiempo para cunseguir todo esso.

14 de Márcio de 2007

Amadeu Ferreira

Abrebiaturas ousadas

abs. - absoluto

adj. - adjectivo

adv. - advérbio

ANT. - antónimo

antrop. - antropónimo

aum. - aumentativo

conj. - conjunção

contr. - contracção

def. - definido

dem. - demonstrativo

dim. - diminuitivo

ind. - Indefinido

interj. - interjeição

loc.adv. – locução adverbial

loc. conj. – Locução conjuncional

m.q. – o mesmo que

num. - numeral

pes. - pessoal

poss. - possessivo

pl. - plural

prep. -preposição

pron. - pronome

SIN. - sinónimo

s.m. – substantivo masculino

s.f. – substantivo feminino

top. - topónimo

v. - verbo

Antonio Mendes · 16/03/2007

Boas noites.

Amadeu, p.f.queira-me enviar a " apersentaçon de I Bocabulairo Mirandés-pertués, 2ª
Muito obrigado.