amadeu · 10/12/2007

editada dia 10-12-2007 16:45:51 por: amadeu

Eisercício – Lhembrar 008 - Notas

Quiero ampeçar por dezir que gustei muito de las repuostas que destes. Todas i cada ua mui antressantes, l mais deilhas aplicadas a la bida ou a la família de cada ua/un, cun dados bien ouportunos. Algues nien you manginarie, mas stan mui bien: nunca me passou pula cabeça que Trindade Coelho podira haber stado pa la Malhada ou para Peinhas Falcon, mas Francisco talbeç tenga rezon, se nun tenerá andado por alhá a acumpanhar alguien que pali fui culas bacas. Por todo esto, nun faç sentido que you steia eiqui a respunder al que stá mui bien respundido.

Tamien you cuncordo que la ounion faç la fuorça, tanto pa l bien cumo pa l mal. I la zounion ye fraqueza. Ende, un facelmente puode ser bencido. Esso bal pa las famílias, pa las naciones, pa las aldés, pa las lhénguas, para todo.

La ounidade ye algo que se cunquista, cun respeito puls outros a quien queremos star ounidos. Sien respeito nun hai ounidade que dure, yá que la berdadeira ounidade ten de ser lhibre i nunca ampuosta a la fuorça. Nua ounion todos ténen l sou lhugar i todos puoden zampenhar l sou papel, i fazer parte dessa ounidade mui defícele de çtruir. Na ounidade todos puoden ser heirois, mas na debison todos puoden mais facelmente chegar a cobardos ou a márteres. I todas las oucasiones son buonas para fraugar la ounidade, cumo por eisemplo un curso de mirandés.

Para alhá desso, ls bimes / las brimes tamien sírben para fazer cestas, cestos, alçafates, cestos sterqueiros, augadeiros, asnales, canastras; yá bi çofineiras de bime, i tamien brícios para deitar ls garoticos (que por esso tamien le chaman de canastra, canastro ou canastrico), mas até yá hoije se fázen outras cousas de bime, cumo porta-chabes i outros anfeites i, a la falta dua buona bara de burmelheiro…. tamien puode quedar a la borda de l lhume, sabe-se alhá para quei...

Subre Trindade Coelho todo mundo falou bien. Agora falta solo falar de Trindade Coelho cumo un de ls mais grandes dibulgadores de la lhéngua mirandesa na fin de l seclo XIX. Anton, queda eiqui treminado que ua de las próssimas liciones será respeitante a la nuossa cultura i tenerá que ber cun esse amportante papel de Trindade Coelho, algo que nunca fui berdadeiramente dibulgado i que hoije stá mais ou manos squecido. Que nun seia por culpa nuossa que se faga essa tan grande anjustiça.

10 de Dezembre de 2007

Amadeu Ferreira