011 - Sustantibo (1)

011 – Sustantibo (1)

[An algues partes destes testo aporbeitei studos feitos por José Pedro Cardona Ferreira].

L númaro an mirandés: singular i plural

L plural de las palabras acabadas an bogal ou an ditongo forma-se acrecentando-le un -s al singular:

Singular

Plural

Singular

Plural

frauga

fraugas

tie

ties

auga

augas

rue

rues

probe

probes

mai

mais

home

homes

rei

reis

lhato

lhatos

miu

mius

parro

parros

tou

tous

La regra manten-se inda que la palabra acabe an bogal nasal, çque essa nasalidade se mantenga ne l plural (-in, -un):

Singular

Plural

Singular

Plural

foucin

foucins

un

uns

mastin

mastins

algun

alguns

chinchin

chinchins

niun

niuns

scarranchin

scarranchins

sertun

sertuns

colharin

colharins

fertun

fertuns

José Leite de Vasconcelos [Estudos de Philologia Mirandesa, I, p. 321] diç que nestes casos l plural se forma acrecentando-le -es al singular, tal i qual cumo ne ls casos a seguir.

Las palabras acabadas por -l, -n, - r, -s, fórman l plural acrecentando-le -es al singular:

Singular

Plural

Singular

Plural

carcanhal

carcanhales

pan

panes

cabanhal

cabanhales

gabilan

gabilanes

funil

funiles

bien

bienes

mil

miles

cumben

cumbenes

candil

candiles

galaton

galatones

miel

mieles

renhon

renhones

spanhol

spanholes

munton

muntones

Singular

Plural

Singular

Plural

palumbar

palumbares

més

meses

mulhier

mulhieres

pertués

pertueses

dezir

dezires

saiagués

saiagueses

calor

calores

mirandés

mirandeses

oulor

oulores

scalhabrés

scalhabreses

Las palabras acabadas an -ç fázen l plural acrecentando-le -es al singular, mas demudando-se l -ç an -z-:

Singular

Plural

Singular

Plural

paç

pazes

perdiç

perdizes

rapaç

rapazes

calantriç

calantrizes

peç

pezes

nuoç

nuozes

beç

bezes

algoç

algozes

lápeç

lápezes

felhoç

felhozes

teç

tezes

cruç

cruzes

alferç

alferzes

lhuç

lhuzes

José Leite de Vasconcelos [Estudos de Philologia Mirandesa, I, p. 320] diç que l plural de lápeç ye lápedes i splica esse plural por la palabra benir de l spanhol an que l z ten ourige ne l d de la fin de lapid. La berdade ye que siempre oubi l plural lhápezes.

L mesmo outor [id., p. 320] diç que l plural de felhó ye felhozes, cumo tamien an pertués. Mas solo tengo oubido la palabra felhoç que, assi, sigue la regra giral.

Alguns sustantbos coletibos

bacada (de buis i bacas)

bando (de páixaros)

bezeira (de cochinos)

buiada (de buis i bacas)

cabrada (de cabras)

camarada (de segadores)

cambada (de pessonas)

capon (de bides)

carga (de feixes, de sacos...)

carteira (de capones ou de lheinha)

colgadeiro (de ubas)

cuorda (de figos)

çúcia (de rapazes)

ganado (de oubeilhas)

jolda (de rapazes, para a brincadeira)

junta (de duis, mulas ou burros)

juntouro (de giente)

mocidade (de giente moça)

niada ou nialada (de páixaros)

pie de mar (bando grande)

quadrilha (de trabalhadores)

ramalhada (de lheinha)

ramo (de flores)

riestra (de cebolhas ou alhos)

torada (de tuoros)

touça (de carbalheiras)

27 de Nobembre de 2006

Amadeu Ferreira