Ditado al alrobés (3), cun uocos para anchir - Resoluçon
amadeu · 26 de nobembre de 2006 · Curso de lhéngua mirandesa (1º Anho)
Ditado al alrobés (3), cun uocos para anchir - Resoluçon
Bárias pessonas se queixórun de la deficuldade deste eisercício i quando las pessonas se quéixan cuido que teneran rezon. Bou anton a tener mais atento i andar un cachico mais debagar. Talbeç seia melhor fazer mais eisercícios i mais simples, que tárden menos tiempo a respunder. Talbeç que algues deficuldades béngan de nun s’antendéren algues palabras, mas quando fur assi, bonda preguntar que you lhougo respondo. Para alhá desso, stou pronto a aceitar todas las buossas sugestones.
1. Nun paraba d’arregalar ls uolhos, al modo que iba andando pul camino abaixo, mirando pa las oulibeiras debelgadas culas azeitunas, nua dénia agradecida a la tierra que las sustentaba.
2. Se nun parasse de chober, iba a benir ende un delúbio, mas sien ua barca cumo la de Noé, yá feita, nun iba a ser fácele aguantar até que la palomba fusse a saber dun ( ou de l) galhico d’oulibeira.
3. Ye l outonho a arreganhar ls dientes pul amarielho de las fuolhas, quando l sol solo puode relhumbrar pulas ( ou nas) grietas deixadas pulas nubres. Nien serie triste, nun fúran ls nius (niales) deixados a la rábia de l aire.
4. Perdien-se ls uolhos na prainura, yá ourtonhada nas yerbas mais tardiegas, i até las lhagonas beraniegas, pa l ganado buer, parecien ls oulhicos tristes cun que la tierra speraba l renacer de l cúscaro, un speilho friu de carambelo.
5. La roseira cunserbou algues fuolhas, sprança de un die se bolbéren rosas brancas de gelada; mas quien puode aguantar las airaçadas, angaranhido a la spera de ls frius?!
6. Miu pai i miu armano nunca daprendírun a screbir (ou l) mirandés.
7. A meidie bei-se melhor do que a meia nuite.
8. Segunda, datrás, era die de fiesta de ls çapateiros.
9. Que horas son? – Ye la ua.
10. Mogadouro i l Porto son tierras sien acumparança.
26 de Novembre de 2006
Amadeu Ferreira
Nota: la resoluçon deste eisercício fui eiqui metida apuis de l die 25 de Nobembre por porblemas anformáticos.
