Eisercício (5) - Mensaiges de Natal i Anho Nuobo (resoluçon)

MENSAIGES DE NATAL I ANHO BUONO

Buonas nuites a todas (os).

Quedei mui cuntento cun todas las mensaiges de Natal i Anho Buono que screbistes. Dius bos l pague. Son todas eilhas mui antressantes i sentidas, cada ua al sou modo. Ye possible que inda béngan mais algues, yá que ye siempre tiempo para recebir buonas mensaiges.

Muita giente ben al nuosso Curso de Lhéngua Mirandesa i lo acumpanha cun muita atençon. Mas inda nun quejírun apersentar-se, mas sei que tamien eilhes mos deséian a todos un bun Natal i Anho Buono.

Pula mie parte quiero desear a todos ls que eiqui deixórun las sues mensaiges i a todos aqueilhes que acumpánhan l nuosso curso

UN FELIÇ NATAL PARA TODOS I PA LAS BUOSSAS FAMÍLIAS I QUE L ANHO DE 2007 SEIA UN ANHO AN QUE L’ HOUMANIDADE BAIA UN CACHO MAIS PALANTRE, CUN PAÇ I DENIDADE PARA TODAS LAS PESSONAS. SEIA QUAL FUR LA RELEGION DE CADA UN, OU QUE NUN LA TENGA, ESTA YE UA MENSAIGE QUE YE BUONA PARA TODOS.

MUITA SALUDE PARA TODOS, AN SPECIAL PA LS QUE STAN MALOS.

QUE 2007 SEIA MAIS UN ANHO DE AFIRMAÇON DE LA LHÉNGUA MIRANDESA I QUE L NUOSSO CURSO PUODA DAR UA PEQUEINHA UPA, CULA AJUDA DE TODOS I DE CADA UN.

Alguns de nós inda nien sequiera mos coincemos personalmente, mas tiempo benirá tamien para esso. Cunto cun bós i cun todos para irmos cuntinando l nuosso camino, debagarico, mas sien parar, a ber se chegamos adonde queremos.

17 de Dezembre de 2006

Amadeu Ferreira

DEIXO A SEGUIR TODAS LAS MENSAIGES AMBIADAS ATÉ AGORA, PULA ORDE AN QUE FÚRUN RECEBIDAS, CORREGINDO ALGUE COUSA QUE STEIA MENOS BIEN, MAS DEIXANDO LAS MENSAIGES CUMO CADA UN LAS SCREBIU:

Mensaige de José Luís Almendra:

Que l Natal i Anho Nuobo fágan mirrar las árboles de l ódio i de la rábia que médran an alguns coraçones, para que las árboles de l amor i de la paç créçan mais i déian fruitos i muitas semientes.
Solo puode sembrar amor i paç quien tubir estas semientes.
Que ls buossos coraçones se ínchan deilhas ye l que bos deseio.

Mensaige de Auch

Anton que l menino Jasus te traia todo l que quejires! Adbirte-te, beila, canta i bebe un copico de bino que faç bien al cuorpo i a l'alma.

Buonas fiestas i buonas antradas!

Mensaige de Ana Maria Fernandes

Depuis de todos estes testos mui antressantes que yá fúrun scritos i apersentados, que desear mais?
Ua cousa amportante de que nun se falou me parece...
Las fiestas de l fin deste anho ne l nuosso calendário crestiano ban a coincidir por acaso – cousa que nien siempre acuntece assi - cun ua de las fiestas mais amportantes de la relegion muçulmana: la fiesta de l’Aïd tamien chamada “fiesta de l cordeiro”...
Algua cousa podemos desear? Si! Na mie openion, que ne ls países adonde inda hai guerras, que tamien son guerras de relegiones, acáben todas essas guerras. Que ls Homes apréndan a dialogar i a gustar de oulhar uns pa ls outros cumo berdadeiros amigos...
Assi, sien miedo de recebir ua bala, todos ls reis magos de la Tierra poderán caminar serenos pul deserto... caminar para oufrecer als ninos las cousas an que sonhórun durante l anho anteiro i essas cousas tamien de que muitas bezes yá mos squecimos : l’Ouro, l’Ansénsio i la Mirra...
Talbeç la magie de l Natal, de l Anho Nuobo i tamien de las fiestas de las outras relegiones afinal que hoije yá nun podemos eignorar seia percisamente esso: la capacidade que ten l Home de se lembrar de cousas mui antigas i ounibersales; i tamien, por que nó?, de cousas quaijeque yá squecidas cumo essas trés:
l’Ouro, l’Ansénsio i la Mirra...!
Feliç Natal i Próspero Anho Nuobo para todos

Mensaige de Tonux

Buonas tardes a todos
Yo stube anfiermo i nun pude respunder al eisercicio 04. Mas l mal yá stá passado i bou a respunder a más este antressante eisercício, que ye lhibre, subre l Natal i l Anho Nuobo: Eiqui bai l miu testo:
A to ls mirandeses an general i an special a ls que trabálhan cun tanto afinco, i talbeç algo de sacrafício, para que l mirandés nun zapareça, son dinos de la mie admiraçon, you deseio un Bun Natal i un Feliç Anho Nuobo. Que la Cunselada seia l más feliç possible, cun to la família junta.
Pa l anho de 2007, deseio que l mirandés seia más coincido i inda más falado. L mirandés bai a bencir, stou seguro, grácias a esta eiquipa i al nuosso porsor que, cun coraige, tanto se sfórçan. Son dinos de la mie admiraçon, repito you.
Eiqui remato este miu pequeinho testo, deseando más ua beç muitas felcidades i Buonas Fiestas a todos.

Mensaige de Pinheirinho

Buonas fiestas de Natal para todos ls porsores de l mirandés.
Astanho, cumo aluno más cábula de l’aula de mirandés, bou a tentar spabilar-me para ajudar a dibulgar la lhéngua mirandesa, cum mensaiges de buonas fiestas que bou ambiar para ls mius amigos.
Assi:
Pa ls mius amigos ambio esta mensaige mui simpres, mas chena de eigual carino que tengo pula lhéngua que mius pais m’ansinórun faç 56 anhos i que traigo ganas de daprander de nuobo. Que l Nino te traiga un Santo i Feliç Natal cun botos de que l anho de 2007 seia para todos cheno de cousas buonas i cun muita salude.

José Ventura.

Mensaige de Franchesco

Buonas fiestas para todos ..
Deseio-bos que las fiestas de l Natal sten ambuoltas an papel de felcidade i atadas cun cinta de paç para que perdúren todo l Anho Nuobo.
Se quieres un anho de prosperidade sembra trigo;   se quieres dieç anhos de prosperidade sembra arboles fruitales; se quieres ua bida de prosperidade sembra amigos Deseio-te que sembres muitos amigos este Anho Noubo.

Mensaige de Natal de Ramos Antão

La mensaige de Natal que you gustaba de screbir a mie armana Lucádia, l’armana mais guapa de l mundo, que bibe na Argentina i hai 30 anhos que nun la beio ye assi:

MENSAIGE DE NATAL

Querida armana,

Cumo la çtáncia i l tiempo que mos aparta (Lisboua al Mar del Plata) ye grande i l tiempo muito, solo mos queda l Ouniberso adonde bibimos ser l mesmo. Neste Natal you tenie un munton de cousas para te oufrecer. Cumo nun puodo ir-me alhá, acupei-me cua streilha, daqueilha que yá nós gustábamos muito quando éramos pequeinhos.
Assi sendo, na nuite de cunsoada mira pa l cielo i ende berás que te lhieba un braçado de deseios. Que tengas muita salude, felcidade i alegrie na cumpanhie de Jesé i las ninas.
Cumo s'arrima l Anho Nuobo, que benga i cun el paç para todo l mundo.
Faustino
Obs: Las mies çculpas de la mie mensaige ser un cahico grande, cumoquiera nun era esso que se pedie.

Mensaige de Natal de Válter A. Deusdado

NATAL?
L que ye l Natal?
Ye un tiempo defrente, porque defrente ls homes quieren que seia.
L Natal ye siempre tiempo de demudar, para que l Anho Nuobo traiga homes nuobos.
Un abraço Mirandés pa to l mundo

Mensaige de Pedro Marcos

Que la fogueira deste anho
Caleça bien l’alma i l coraçon
I que l calor seia tamanho
Que traia Paç Salude i buona çposiçon

Un Santo Natal i feliç Anho Nuobo, son ls botos que bos deseio a todos.