Nun ye fácel mantener esto tols dies, mas cun la ajuda que bai aparcendo i cun l que bou oubindo eiqui i aculhá custa menos.
Hoije tenie antençion de screbir subre outra cousa, mas demudei de eideia para acabar de falar de l barro.
Muita giente diç que ls adobos eran dua maneira, las teilhas éran uas melhores que outras. Que tamien se rebocában las paredes, sei alhá que mais! Que you nun antendo, mas you nun me anraibo e até quedo cuntento i cun la cumbersa, falamos sendinés i daprendemos muita cousa.
Pus ye berdade que se rebocában las paredes cun barro i ende teneis un retrato.
La parede rebocada cun barro
Dues teilhas d’Atanor
Mas habie muitas mais cousas que se fazien cun l barro, mas nun era ne l forno de Atanor. Benien de Zenízio i de la raia a bender ls cacharros. Outras bezes íban a por eilhes al Naso i a la Luç. Muitos destes cacharros éran feitos an Mobeiros(Spanha) cerca de Paradela.
Habie las barrilas i ls cantaros para l’auga. Ls barrenhones para fazer la çuça i las tinalhas para l azeite, las azeitunas i para l binagre.
Ls cacharros
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
