Reuniu hoije an Sendin l Capítulo de la Cunfrarie de Einologie i Gastronomie de Trás-os-Montes i Alto Douro. La Cunfrarie ten cumo percipal funçon l aprécio i la purmoçon de l bino i de ls comeres regionales.
Ls cunfrades a chegar
L Capítulo ye la reunion mais amportante i nessa reunion stan siempre la maior parte de ls cunfrades i pessonas cumbidadas. Ye tamien nesta reunion que se fázen las cerimónias para la antrada de nuobos cunfrades.
Nesta reunion fúrun admitidos dous nuobos cunfrades, destes un ye de Sendin i tamien un cunfrade de honra.
La cerimónia fui ne l salon de ls bombeiros.
La mesa de l Capítulo
A seguir a las cerimónias ls cunfrades fúrun a besitar la Tanoarie an Palaçuolo.
La besita a la tanoarie
Seguiu-se l almuorço onde aperciórun ls nuossos binos i de ls quales gustórun, an special de l Ribeira de l Corço (branco) que cunsiderórun cumo de ls melhores que ténen bebido.
L comer fui l que ye questume ne l die de la matancia. Garrotes para ampeçar, apuis las sopas i a seguir l cozido a la moda antiga. Apreciórun muito todo, mas l arroç de berça inda mais.
No fin comírun bola doce, queiso de cabra i doce de bóbeda.
L almuorço
Ne l sitio de ls retratos podeis ber mais retratos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
