Hoije ye l die de Santo Andrés. Cun este die i cun la semana an que calha l die deste Santo, ls sendineses relacionában l arico de ls panes que yá íban nacidos.
I este anho yá se béian bien.
L pan nacido
L arico era arar ls panes, cun un arado de ourelheiras mais pequeinhas, por l suco de la sementeira, para limpar la hierba de l fondo de l suco. L arico era mui útele para l pan. Dezien ls bielhos:
L’arico de Santo Andrés
Bal por três!..
La niebe na Sanábria
L friu yá apertaba, cumo este anho, que yá se bei la niebe na sierra de la Sanábria. Ye de alhá que sopra l aire mais friu.
Por esso dezien tamien:
Ne l die de Santo Andrés,
Entra l’Ambierno de beç!..
Mas yá nun neba tanto cumo quando tirei este retrato hai mais de 20 anhos:
Ls garoticos chenos de friu
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
