Este anho nun ten sido un bun anho para la laboura.
Las ubas fúrun poucas i las azeitunas eigual. Mas ne l meio de las zgrácias hai siempre quien se salbe.
Fui a tirar un retrato a apanhar azeitunas i mirai para esta oulibeira!..
Carregadica de azeitunas
Falei cun ua tie que andaba a apanhar azeitunas eilha sola, mas saquei-le a trato que tenie que falar sendinés i arrespondiu-me:
- Ah, senhor Almendra, yá nun hai quien ajude.
- Nun se puode queixar, que inda ten quien la ajude.
- Pus si, mas agora l miu filho nun podie i bin you sola.
- Mas para la semana yá la ben a ajudar.
- Pus el ye que faç todo, mas l pior bai a ser para podar. Muitas binhas ban a quedar. Nun sei cumo se bai amanhar cun la Dega.
A apanhar azeitunas
- De algue maneira se há de arranjar.
Ua binha yá sin fuolha
Esto tamien son arribas
Cumo será sin binhas?
Se deixáren ls sendineses sculhir, ban a ser siempre lindas, porque serán las nuossas arribas.
Deixo-bos esta quadra, de Francisco Nebro, de l sou libro de poesie L Ancato de las Arribas de l Douro:
Las arribas son de naide,
Las arribas son de todos,
SON ARDANÇA. Deixai de
Als sous males quedar xordos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
