Purmanhana, fui a la Compratiba a tratar cun un ampresário l melhor modo de fazer l registro de las marcas de bino de la Compratiba, ne l Brasil. L nuosso bino yá fui para alhá para amostra i gustórun.
La giente de l Praino yá bai a poder buber l bino de las sues binhas, ne l Brasil, drento de pouco tiempo.
Apuis, cumo tengo l “jeep” abariado, fui als Abelinos a ber cumo staba la cumpostura i dei-me cuonta que inda solo tenie falado de las cousas que se fazírun de nuobo.
I ls que hai tantos anhos ténen feito Sendin bibir?
Ls Abelinos
Muitas outras pequeinhas i médias ampresas hai zde muitos anhos, an Sendin. Las oufecinas de ls Abelinos son ua dessas i inda me lembra de quando ampeçórun a cumponer becicletas. Sendin siempre fui ua tierra de ampreandedores i assi bai a cuntinar.
Unipeneus
Esta ye outra ampresa que se anstalou an Sendin i mostra bien la fama que Sendin tube siempre, traendo ambestidores de fuora.
Muitas mais hai i als poucos bos las irei mostrando. Nun ye solo para que se béian, mas para que ls que salírun de Sendin, hai muitos anhos, se lémbren i para eisemplo d’outros.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
