Será an Sendin ?
L die 19 de Outubre preguntaba donde éran ls retratos que bos mostraba i ne l die 20 dába-bos la respusta. Hoube quien stubisse atento i acertou, mas cumo sei que la maiorie de la giente anda straída por las rues i nin sequiera se dá cuonta de l que se puode apreciar, bou a fazer de nuobo un eisercício para ber ls que tóman atento ne l que béian.
Onde ye esta casa?
Yá apreciestes bien la puorta?
Nin toda la giente aprecia estas cousas i hai até quien diga que esto son pantominas. Cada un ten la sue eideia i puode pensar cumo quejir, mas cuido que pensar cumo era la bida de ls nuossos antepassados i cumo fazien las casas i porquei, ye mais amportante que se pensa.
Habie arte ne l que fazien, nun bamos agora a guardar todo, mas habie de se deixar ua ou outra cousa, dessa arte i desses menumentos, que cuido ténen mais balor que muitos que hai por ende. Ye que estes son ls menumentos que ténen cun eilhes ls trabalhos i sacrafícios de muitos sendineses.
Esta era la antrada para la parte de riba de ua casa
Quando ando por l pobo a tirar retratos, lougo aparece un ou outro a ppreguntar se ye para la anternete. Al percípio quedában a pensar, mas agora lougo me ban a dezir para tirar i poner ciertos retratos. I ua cousa que me ademira, ye que yá muita giente aprecia i ténen proua de mostrar ciertas cousas antigas i dízen-me que l tire l retrato, nin que sei para quedar cumo lembrancia.
Ye por todo esso que tengo que cuntinar…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
