Faç friu i chuobe muito, inda fui a dar ua buolta por ende, mas quaisque nun se bie naide. Mas tamien fazie falta l’auga, yá que la seca era mui grande.
Este anho parece que bai a ser un anho de fame. Ye anho bissesto i cumo diç l pobo:
“Anho bissesto, cabe palha i pan, todo nun cesto”.
Ye mesmo un die d’Ambierno
Nun bamos yá a pensar que todo ban a ser zgrácias, yá houbo muito anho bissesto i l mundo cuntina, para uns bien i para outros menos bien. No meio de las zgrácias hai siempre quien se salbe.
Mirai l retrato que tirei apuis de l purmeiro:
No meio de todo inda se béian casas cun Sol
Mas fui a ber ls alhos i d’eilhes nin selombra.
Las patatas stan chenas de grilhos, cumo ye buona luna, toca de ir a tirá-los se nó las patatas quédan angurriadas.
L bino tamien teneis que tener cuidado cul, solo se debe strefegar nun die claro, se nó queda cumo arrope. I este anho la cousa nun ye famosa.
Nun bedes cumo staba l die
Quien bos abisa buosso amigo ye.
Este anho ten tamien un contra, entra debaixo de la capa de l Planeta Marte, que ye l dius de la guerra de l tiempo de ls romanos.
Por esso bamos a fazer todo para que haba paç.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
