Todos ls anhos ls mardomos de la fiesta de Santa Barbela dan ls reis.
Ne l salon de la Junta de Freguesie tenien todo bien cumposto i las mesas chenas de todo, nun faltórun ls fruitos secos, ls doces de toda la culidade, las rabanadas, las fritas, l bolo rei i las ubas.
De beber tamien habie de todo.
Ua mesa chena
Mas cumo hai siempre ls mais ambergonhados, ls mardomos fúrun pul meio de la giente a dar de todo.
Fui ua nuite de cumbíbio i de fiesta.
Un mardomo cun las manos chenas
I ua mardoma tamien
You aporbeitei para comer ua frita, un doce de l canto de la masseira i outro de l tacho, que gusto muito, para beber ua copa de licor que ua mardoma andaba a dar.
Silbino tamien agarrou l licor
Ls mardomos tamien cantórun ls reis i nun stubo nada mal.
Houbo l sorteio de ua garrafa de içque i baile que inda cuntinaba quando sali.
L baile
Inda bou outra beç alhá apuis de screbir la nuoba para comer ua cabaca.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
