Ampeçou la scuola apuis de l Natal i tenie un trabalho para bos mostrar durante dous ou três dies, mas ls reis fazírun que solo esta semana bos l mostrasse.
Muitas bezes l tiempo passa i naide registra l que se bai passando cun las cousas i assi se bai squecendo l passado i poucos dan balor al que tenemos.
La scuola bielha de Camino Prado, nun fui la purmeira scuola de Sendin i nestes dies bos irei dezindo l que sei subre esso.
Hoije ye la casa de la cultura i l recreio ye un jardin cun ua fuote.
L jardin i la fuonte
La scuola tenie ua cerca cun grades de fierro trabalhado i uas squineiras cun la data i la anscriçon de quien la fizo.
Las antradas de la cerca éra an piedra. Habie dues antradas porque la scuola staba debedida, dun lado ls rapazes i de l outro las rapazas.
La antrada de la cerca
Fui tiu Elizeu Atanázio, sendinés que fui para l Brasil a ganhar la bida i quando se biu cun denheiro, nun se squeciu de la sue tierra i mandou fazer la cerca, an 1950.
Ua squineira onde se bei l nome i la data
Quando se fázen obras nas casas antigas, quasque siempre se squece de deixar algo que registre l que fui ou l que deberie quedar de l antigo, cumo recuordo.
Inda bien que esso nun acunteciu neste caso.
Ne l jardin quedórun las squineiras, que podeis ber.
L sitio onde stan las squineiras
L nome de Elizeu Atanásio quedou alhi i bien, yá que fui un home que nunca squeciu la sue tierra i muitas outras cousas fizo, cumo la bancada de l campo de la bola. Mas un die se falará mais.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
