Quando bos mostrei la peinha acerca de la cruç de l braço quebrado, falei nas graburas. Yá muitos oubistes falar de las graburas de Foz Coa i por bezes hai cunfusones antre uas graburas i outras.
Anton quando quieren çfazer de l trabalho de algue pessona misturan todo. Hai ls que nada anténden i l fázen por eignorancia i hai ls que anténden i que l fázen por maldade.
Por esso ténen que se chamar las pessonas antendidas para studar las cousas i apuis responsabelizar-las.
La marra antre Sendin i Trabanca un pouco mais alantre
La marra tamien ten anscriçones, mas son de outros tiempos. Todo esse studo you pedi para fazéren, mas an Sendin nada era feito. Nessa altura fizo-se l studo de algues graburas que you andiquei, por la Ounibersidade de l Porto, cumo an Atanor i outros lugares.
Inda iremos a tiempo de salbar algue cousa nuossa?
Las anscriçones na piedra de la marra
Todas las graburas ténen ua stória i por eilhas muito se puode saber. Yá bai sendo tiempo de ls palradores dexáren de cuntar cuntas i séren ls arqueólogos a falar. Mas nó arqueólogos de dues crouas, que solo porque ls ampregórun i le dórun l mando, yá cuidan que ténen l dreito a fazer l que le dá la gana.
Outra anscriçon para l outro lado de la bia romana
Esta ye fácele de antender i inda hai giente que se lembra de oubir cuntar cumo fui feita.
Mas ten tamien ua stória. Dou estes eisemplos para ber las çfrencias antre uas i outras. Por esso cuido que todos debemos mirar i dar a coincer l que furmos scubrindo para nun se cuntinar a dezir que Sendin nun ten stória.
Esta anscriçon ye romana
Fui ancuntrada nua bila romana, de las mais amportantes de l praino. L camino que passa alhá acerca ben a tener a la bia romana. Tamien naide la quier studar.
Mas bamos a la anscriçon de Penhas Scabalho.
“ Memoria de Candido Hipolito, vitimado por um raio, neste lugar, em 21 – 9 – 1909. Recordação de Domingos Morete”.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
