Onte a respeito de l turismo mostrei-bos algues fuontes i dei sugestones. L jornalista ten que mostrar l buono i l malo i dar la sue oupenion, mas you nun quiero que penseis que ye para seguir la mie eideia, nada desso. Quiero ye que penseis an cumo fazer algo por Sendin.
Screbir nun ye fácele porque hai siempre quien anterprete las cousas de bários modos, mas se naide l faç, ye pior. Jornalista? Pus ye berdade, zde hai bários anhos.
La fuonte de Cabeço Lebreiro
Ende teneis un eisemplo de cumo nun se debe tratar ua fuonte. Será porque fui l pobo a fazer-la? Talbeç, porque hai que acabar cun todo l que fui feito i fazer cousas nuobas, lindas i que se puoda dezir quin las fizo, ou porque nun se dá l berdadeiro balor al pobo.
La fuonte de la Calçada
Esta amanhou-se, mas squecírun-se las outras.
La fuonte de Cabeço Lebreiro bien puode benir a ser un sito agradable, hai campo, ye un zbio de la strada, solo falta buntade. Que esta Junta de Freguesie, nun la squeça.
L sitio de la fuonte de Cabeço Lebreiro
Outra fuonte abandonada i que spera que la amánhen. Hai que tratar de la nuossa memória i guardar las státuas de l nuosso pobo. Essas son las que melhor representan ls sendineses. Sin nome, mas onde stá l trabalho de muitos.
La fuonte de ls sartigalhos
Quando passo nesses sítios beio ls que alhá trabalhórun, ls que alhá matórun la sede, ls que alhi botában ua ambuça d’auga na tiesta, quando acarreában l pan.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
