Hoije ye l die de San Bicente que fui l purmeiro patrono de Pertual. L purmeiro rei de Pertual era mui deboto de San Bicente i mandou traer ls sous restos mortales de l Cabo de San Bicente, onde fúrun ancuntrados, para Lisboua.
Diç la lenda que l traírun para Lisboua nua barca i que esta fui siempre acumpanhada por dous cuorbos i ye por esso que l’amblema de la cidade de Lisboua ten, zde la purmeira dinastie, la barca i an cada punta desta, dous cuorbos.
San Bicente
Nun bou a screbir subre la bida de San Bicente, que serie anteressante, mas subre l que la giente de l Praino dezie a quando de l die de San Bicente, que ye die 22 de Janeiro.
Dezien i inda se diç, porque ls dies yá son maiores:
Ne l die de San Bicente,
Yá nun hai ningua ourrieta
Onde l Sol nun entre.
Las Ourrietas ne l die d’hoije
Cumo gusto de saber las cousas, fui a las Ourrietas a tirar l retrato.
Por la manhana staba ua nubrina mui grande i staba a ber que nun iba a ser berdade l dito popular, mas a la tarde era mesmo berdade, l Sol antraba bien nas ourrietas.
L retrato de un pan i al loinje Picuote i Penilha
Cumo l die de San Sebastan fui fiesta i bos mostrei cumo fui la fiesta, deixei para hoije outro dito que ben mesmo a calhar tamien.
Pul die de San Sebastian,
Tira la oubelhica de l pan.
Outro retrato de l pan
Cumo bedes pul retrato, l pan yá bai apuntando la canha i hai que eibitar que la cóman.
Staba Ordenança comigo a ber i yá habie algues fuolhas comidas por las liebres.
Ordenança mais nuobo, ye l guarda de la caça.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
