Die 20 ye mesmo l die de San Sebastian i hoije calhou an Demingo l que fui melhor. Zde que hai bombeiros an Sendin, son eilhes que fázen la fiesta, agora i ne l Berano.
An Janeiro, cumo yá dixe soutro die, ne l die de San Sebastian, an Sendin, ye quando se dan a San Sebastian las ouferendas por tener guardado ls cochinos, que ban al talho .
Cada tierra ten l Santo de la sue deboçon i an Sendin ye San Sebastian l santo que guarda ls cochinos.
Las ouferendas
Por la manhana, al toque de la gaita, ls mardomos ban por las rues a reculhir las ouferendas i líban uns galhos de fierro ou de palo para culgar las cousas que l dan.
Líban tamien uns cestos para ls fruitos i outras cousas que le ouferécen al Santo.
Ls mardomos i la gaita por las rues
Apuis ye la missa i la precisson que bai de la eigreija até a la capielha de San Sebastian para lebar l Santo, que queda alhá, na sue capielha.
Antes de antrar, ye questume cantar-le l hino de San Sebastian, ua cançon tradicional, para la spedida.
La percion
Al acabar la percion i yá na frente de la eigreija, faç-se la arremataçon de todo l que fui arreculhido por la manhana.
Este anho dórun muita cousa cumo se puode ber ne l purmeiro retrato.
L mais anteressante fui un par de palombas i un leiton. Mas dórun pies, chouriças, bulhos, chouriços, ourelhas i até bino i uas botas de bezerro.
A arrematar l leiton
Anquanto se fazie la arremataçon de las cousas, ls bumbeiros dançórun dous lhaços de ls pouliteiros. Yá ténen un grupo que dança cumo ls melhores de l cunceilho.
Ls bumbeiros a dancáren
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
