Sendin tubo un grande pugelista ne ls anhos 20 de l seclo passado que lebou l nome de Sendin a ls quatro cantos de l mundo.
De sou nome Anibal Fernandes, fui para França an 1921 onde aprendiu la arte de l boxe.
Ls cumbates an toda la Ouropa balírun-le l nome de la Corça Transmontana , por cousa de la sue agelidade.
Aníbal Fernandes
Fúrun mui comentados ls sous cumbates, na Ouropa i la sue fama fizo cun que fusse cumbidado a cumbater na Argentina i ne l Brasil.
Ye célebre l eipisódio que se passou nun cumbate an França i onde staba a ber l cumbate la tie Grabiela, que mais tarde benerie a ser sue cumadre. L cumbate nun le staba a correr mui bien, el era de la categorie de pesos lebes, i ne l meio de la giente oubiu-se gritar an sendinés:
“À Anible, se nun dás tu cabo desse hingrinhas de l c..., bou you alhá que até l ref…” (era la boç de tie Grabiela).
Pus l nuosso pugelista ganhou nuobas fuorças i ganhou l cumbate.
L nuosso pugelista yá ne l Brasil
Ne l Brasil benciu l campeon de l Brasil, Hugo Italo. Ganhou muitos outros cumbates i fui siempre bien cunsiderado ne l Brasil, onde era coincido por “ boxeur gentleman” por cousa de la sue agelidade i eiducaçon.
Para ber l sou balor, queda solo esta anformaçon. Hugo Italo benciu l campion de la América de l Sul, por KO al 1º. assalto, Juan Carlos Gazala, an 1931.
Ne l Brasil fundou l Centro de Cultura Fisica Pertual-Brasil de l Rio de Janeiro.
L que dezíen ls jornales dessa altura
Mais tarde bino para la sue tierra i inda fui treinador de un de ls maiores pugelistas pertueses de todos ls tiempos, Santa Camarão, cun quien inda cumbatiu, an Sendin, para mostrar la arte de l boxe, als sendineses.
Santa Camarão
Muito mais haberie para screbir, mas eiqui queda mais esta nuoba.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
Ua proba:
