Las nuobas de l hoije stan a tener un anteresse que you nunca pude maginar. Cada nuoba faç cun que muita giente se anteresse mais i querga saber mais cousas de Sendin, de la sue giente, de la sue stória.
I nun son solo ls que me scríben, cumo tamien ls que, por onde bou, me fálan ne l hoije .
Stába ajunto al cruzeiro de Camino Prado i por fuorça que tenie que screbir subre el. Lougo alhi tube que splicar l pouco que sabie.
L cruzeiro
Mas la cumbersa lougo trouxe outras cousas i apuis de splicar que srº. Aníbal, pai de la D. Odete fui l que mais fizo fuorça para se mudar l cruzeiro, lougo outros quejírun saber de la bida de srº. Aníbal cumo pugelista afamado que fui.
La página de l jornal de Sendin de 1984
Era un jornal feito an fotocópias, i que era de l Centro Cultural. Mas la política i la ambeija de alguns lougo l fazírun acabar, mas siempre algo queda.
Outra página cun las nuobas de ls jornales
Yá nessa oucasion faziemos açones de formaçion, jornales i ancentibabamos l mirandés. I tal cumo hoije aparcírun ls bielhos de l Restelo.
Mas agora stamos mais spirtos i nun bai a ser fácele fazer-mos caer.
La parte de baixo de l cruzeiro
Mostro-bos esta parte, porque ye onde stan scritos ls nomes de quien l mandou fazer.
Hoije fui la antroduçon de l que bou a screbir manhana i passado.
Bou a screbir subre l cruzeiro, para todos quedardes a saber la sue stória. I apuis bou a tornar a screbir, cumo an 1984, subre srº. Aníbal i subre l boletim de l Centro Cultural.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
