Hoije ye l die de Santo Amaro i an todo l praino se celebra este die. Para ls lados de Mogadouro ye mesmo fiesta an algues tierras.
Tamien an todo l norte de Spanha, mas an special na Galiza, este die ye l die an que se come l bulho ou botelo .
Santo Amaro ye l Santo que guarda ls cochinos i las fiestas son feitas cun las ouferendas de carne de ls cochinos que fúrun al talho .
Santo Amaro
Este ye l Santo que stá na eigreija de Sendin, lougo a la antrada, a la mano dreita.
Cumo ye la purmeira fiesta, la giente diç:
Die 15 de Janeiro
Santo Amaro
Ye l purmeiro
An Sendin l Santo que ye celebrado por guardar ls cochinos ye San Sebastian.
L bulho ou botelo
Por todos ls lados onde se faç la fiesta de Santo Amaro, come-se l botelo a la moda dessas tierras.
Nós dezimos bulho i cuido que nun stá mal, yá que ls bulhos son feitos de carne de uossos de cochino, que se méten ne l stómado i nas tripas gordas de l cochino.
L bulho ou botelo, an Sendin come-se cun cascas, mas an muitas tierras ye cun patatas i berça cozida.
A quinze de Janeiro,
Santo Amaro botelheiro.
L prato de botelo
Hoije mostro-bos este prato, que tamien ye regional i apuis, ne l die de San Sebastian, yá beremos cumo ye an Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
