Yá uns dies que habie bisto las ciguonhas, mas ou nun las ancuntraba a jeito ou staba a chober.
Este anho, cumo ben assucedento hai uns anhos, las ciguonhas chegórun mais cedo.
Dezien d’atrás:
Pul San Brás, ciguonha berás.
San Brás ye die 3 de Febreiro i agora hai anhos an que bénen por finales de Dezembre. L tiempo stá a demudar muito.
Las ciguonhas
Houbo uns anhos que benien poucas i ls nius fúrun zaparecendo, mas agora cun l’anteresse por l’ambiente i l apoio de la giente yá se béien bastantes.
La Junta de Freguesie, antes desta, fizo este niu, mas sin resultado.
L niu acerca de la strada romana
La Junta de Freguesie, que agora tenemos, fizo este ne l bal de Bezindeira. Bamos a ber se las ciguonhas ban alhá a acabar de fazer l niu.
L niu de l bal de Bezindeira
Mas onde las ciguonhas ban al cierto ye al sou niu de toda la bida. L niu ne ls cerrados de la Calçada.
Fui alhá a ber i alhá staba la ciguonha toda amprouada. Ls animales alhá sáben porque scuolhen ls sítios.
L niu na Calçada
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
