Muito se fala sin saber i solo por oubir dezir. Ye un malo hábito que muitos tenemos de querer saber todo i de todo. Somos assi ls sendineses. I recoincer que alguien sabe mais ou melhor sibre ua cousa ye un problema.
L hoije nun quier saber mais nin menos, ye un sitio de anformacion i solo ten que screbir l que sabe i de que ten las probas ciertas.
Cumo onte bos dixe, acá stou a cuntar la stória de l cruzeiro.
L cruzeiro
A la punta de riba de las eiras, mais ou menos onde hoije ye la Caixa Agrícola, un bui, ne l tiempo de la trilha de meados de l seclo XIX, por rezones que nun se sabe, scuornou l bisabó de la D. Odete (you bou a screbir solo ls nomes de las pessonas mais coincidas para que todos puodan antender mais de brebe i para nun screbir muito) i matou-lo.
Ls filhos; José Luís Falcão, Ana Falcão, Leopoldina Falcão i Maria Falcão, cuntratórun l mais afamado canteiro de l Praino, para fazer ua cruç ne l sitio onde morriu l pai.
L canteiro deixou la sue marca ne l cruzeiro
L cruzeiro tenie, onde hoije ten la cruç, ua berdadeira pieça de arte, cumpuosta por l Cristo i la image de Nossa Senhora. Nun se sabe al cierto cumo se partiu essa parte.
L que hai muitos anhos you cunsegui saber, fui que por trás de la casa que ye de la filha de la D. Amélia, an Camino de Prado, se ancuntrában alguas partes, cumo la cabeça de l Cristo, ua mano i la image de Nossa Senhora. Las outras partes dezien que starien ne l poço de la curralada dessa casa.
Ua parte de la queluna de l cruzeiro
Cumo l cruzeiro era ua berdadeira obra de arte, quando se celebrában ls cententenairos de la fundaçon i de la restouraçon de Pertual, an 1940, l prejidente de la Câmara pediu a la familha de ls duonhos de l cruzeiro para l deixáren poner, onde stá hoije. Srº. Aníbal que staba casado cun la filha de José Luis Falcão, todo fizo por esso. I fui por esta rezon, que onte falei an srº. Anibal.
Mais un pormenor de la queluna
L cruzeiro fui mudado i ponírun alhá l nome de quien l mandou fazer, stá na placa de la parte que bos mostrei onte.
L cruzeiro tenie l Cristo na Cruç i sue Mai als pies i al redor de la queluna, ten sculpidos todos ls artimanhos usados para la cruceficaçon de Cristo.
La Berónica
Bal la pena mirar para todo l que alhá ten.
Cumo curgidade bou a dezir-bos quien fúrun ls quatro armanos.
José Luís Falcão era l abó de la D. Odete i suogro de srº. Aníbal.
Leopoldina Falcão i Maria Falcão morrírun solteiras i fúrun eilhas que cumponírun la capielha de San Sebastian.
Ana Falcão casou cun tiu Melindro i tubo ua filha de nome Júlia, mãe de l Pe. Zé. Morriu cedo i tiu Melindro bino a casar cun tie Çancia de que naciu la D. Amélia. Sculpai nun screbir ls nomes berdadeiros, mas cuido que assi antendeis melhor.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
