Stá na moda l turismo campesino i muito se fala nel. Mas tenemos que fazer muito mais para que seia ua realidade i traiga mais rechesa a la giente.
Mas nun podemos ser nós solos, porque an todo l lado ls outros son ajudados. Nun me béngan cun essa de que solo sabemos pedir, mas pedimos porque somos ls mais probes i tenemos dreito a tener l neçairo.
Nós bamos fazendo l que podemos, ye ber l que Sendin ye hoije, mas hai muitas outras cousas que fáltan.
La fuonte de Camino Prado
Ye linda, mas ls de la cidade bénen acá por la ber?
Cuido que nó, mas ye algue cousa i se a essa se ajuntáren outras einiciatibas cumo tener la casa de la cultura siempre cun atibidades, anton la fuonte será ua refrencia.
La fuonte de la Strada Nacional
Outra refrencia puode ser esta fuonte, se l parque de las eiras se fazir i se alhá houbir tamien atibidades que trágan giente. Toda essa zona ten que tener animaçon. Stou mesmo a oubir “ mas cumo? ”. I you respondo: -“ esses que son i quieren ser de la junta i de la Câmara, que dígan ”.
Ua fuonte particular
L pobo solo puode fazer l que le déixan i cul denheiro que ten. I cumo podeis ber inda hai quien tenga eideias.
Outro recanto angraçado
Ye ponendo las eideias a la mostra que se puoden fazer muitas cousas. Quantas casas de turismo tenemos acá? I las que tenemos, son bien coincidas? Que faç l turismo?
L hoije bai cuntinando a mostrar l que Sendin ten, cun algun sacrafício, i an brebe cun nuobas eideias.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
